درجات تحميص القهوة: فاتح ولا وسط ولا غامق؟
نفس حبة البن ممكن تطلع فنجان منعش بحموضة فواكه، أو فنجان تقيل بمرارة مستحبة، والفرق كله في التحميص. لما تفهم الدرجات هتعرف تختار قهوتك بثقة بدل التجربة العشوائية.
التحميص بيعمل إيه أصلًا؟
البن الأخضر النيء مالوش طعم القهوة اللي بنعرفه. التحميص هو اللي بيطلع النكهات: في الأول بتظهر الحموضة ونكهات الفواكه والزهور، وكل ما التحميص يزيد بتحل محلها نكهات الشوكولاتة والمكسرات والكراميل، ولو كمّل أكتر بيوصل لطعم التحميص نفسه بمرارته المميزة.
التحميص الفاتح
لون بني فاتح، حموضة مشرقة، وريحة عالية. الدرجة دي بتسيب شخصية البن الأصلية تبان بوضوح، وعلشان كده هي المفضلة لعشاق السنجل أوريجن. من عندنا: الشرقي الفاتح عالريحة وإثيوبيا.
التحميص الوسط
نقطة التوازن: حلاوة أعلى، حموضة أهدى، وقوام أكمل. بيمشي مع كل طرق التحضير تقريبًا، وعلشان كده معظم توليفاتنا التركي والفرنساوي متحمصة وسط. لو مش عارف تبدأ منين، ابدأ هنا.
التحميص الغامق
لون غامق وزيوت باينة على الحبة، مرارة مستحبة وقوام تقيل، ونكهات كاكاو وكراميل محروق. ده اختيار الإسبريسو الكلاسيكي لأنه بيقف قدام اللبن في الكابتشينو واللاتيه. من عندنا: إسبريسو علاء الدين دارك.
عداد التحميص على منتجاتنا
على كل منتج عندنا هتلاقي عداد من 5 حبات بن: حبة واحدة يعني فاتح جدًا و5 حبات يعني غامق جدًا. مش محتاج تحفظ مصطلحات، بص على العداد وهتعرف الفنجان ده هيبقى شكله إيه.
